14/06/2012
Mae Dŵr Cymru yn cwblhau buddsoddiad gwerth £52 miliwn yn ne-orllewin Cymru yn 2011-12
Mae gwerth £82 miliwn yn rhagor o waith yn awr wedi’i ddechrau
Mae Dŵr Cymru Welsh Water yn adrodd bod buddsoddiad yn ne-orllewin Cymru yn ystod 2011/12 wedi cyrraedd £52 miliwn – ac mae rhagor o wariant o £82 miliwn ar y gweill eleni i gynnal gwasanaethau o’r ansawdd uchaf i gwsmeriaid.
Gan gyhoeddi’u canlyniadau ariannol am y flwyddyn ddiwethaf, fe adroddodd Dŵr Cymru Welsh Water bod eu rhaglen wario ar y llwybr cywir i gyflawni hwb uchelgeisiol gwerth £1 biliwn i seilwaith gwasanaethau dŵr drwy’u hardal i gyd dros y tair blynedd nesaf.
‘Roedd cyfanswm y gwariant yn ne-orllewin Cymru yn ystod 2011/12 ar raglenni cynnal a chadw ar gyfer systemau dŵr yfed a dŵr gwastraff y cwmni yn £27 miliwn, gyda buddsoddiad dros y flwyddyn o £20 miliwn yn cael ei wario ar gyflawni gwelliannau i ansawdd dŵr yfed a’r amgylchedd. Fe wnaed buddsoddiad gwerth £2 filiwn i gymorth twf economaidd drwy sicrhau cynhwysedd rhwydwaith digonol ar gyfer datblygiadau newydd, ac fe fuddsoddwyd £3 miliwn yn rhagor i liniaru’r perygl o lifogydd carthion i eiddo.
Fe gwblhawyd buddsoddiad hefyd ar gyfleuster treulio anaerobig datblygedig gwerth £29 miliwn yng ngwaith trin dŵr gwastraff Afan. Mae’r cyfleuster yn echdynnu nwy methan o ddŵr gwastraff, sydd wedyn yn cael ei ddefnyddio i gynhyrchu’r trydan cyfwerth y byddid ei angen i bweru 3,500 o gartrefi. Mae gostyngiad yn y ddibyniaeth ar bŵer o danwydd ffosil yn galluogi Dŵr Cymru i gadw biliau cwsmeriaid i lawr.
Fe wnaeth yr ardal hefyd elwa oddi wrth ran o fuddsoddiad gwerth £9 miliwn ledled De Cymru i leihau gollyngiadau o rwydwaith enfawr y cwmni o bibellau dŵr.
Fe ddywedodd rheolwr gyfarwyddwr Dŵr Cymru Welsh Water, Nigel Annett, “’Rydym yn buddsoddi’n hael mewn prosiectau yn ne-orllewin Cymru, gan uwchraddio’r rhwydwaith dŵr gwastraff i leihau hyd yr eithaf ar effaith ein gweithrediadau ar yr amgylchedd a hefyd i ddiogelu eiddo rhag y perygl o lifogydd o garthffosydd, fel ei gilydd.
“Yn ystod 2011/12, fe wnaed buddsoddiad i wella a chynyddu cynhwysedd y gweithfeydd trin dŵr gwastraff ac allfeydd gorlif y rhwydwaith. Fe wnaethom hefyd gwblhau’r gwaith o osod gwaith treulio anaerobig yng ngwaith dŵr gwastraff Afan ym Mhort Talbot i ddal nwy o ddŵr gwastraff a’i drosi o i fod yn drydan.
“’Rydym yn cynyddu lefelau buddsoddi yn yr ardal hon yn ystod 2012/13, gan ganolbwyntio ar welliannau i brosesau gweithredu mewn amryw o weithfeydd trin dŵr gwastraff eraill, yn cynnwys ein gwaith yn Abertawe, a chynlluniau ychwanegol i liniaru llifogydd o garthffosydd, yn cynnwys cynllun Llansawel, sydd eisoes wedi hen ddechrau.
“Mae’n buddsoddiad mewn triniaeth dŵr gwastraff o fudd i’r amgylchedd drwy helpu i wella ansawdd afonydd a dŵr ymdrochi arfordirol - sy’n cyfrannu at nifer y traethau Baner Las sydd gennym yng Nghymru.”
‘Roedd uchafbwyntiau buddsoddiad yn 2011/12 yn cynnwys cynlluniau mawr ar y rhwydwaith dŵr gwastraff yng Nghastell Nedd, Abertawe a Sir Benfro, ynghyd â phrosiect i wella’r amgylchedd yng ngwaith trin dŵr gwastraff Aberporth yng Ngheredigion.
Mae rhagor o fuddsoddiad gwerth £82 miliwn eisoes ar y gweill neu wedi’i gynllunio yn ne-orllewin Cymru ar gyfer y flwyddyn ariannol bresennol, 2012/13. Mae £36 miliwn yn cael ei wario ar weithiau cynnal a chadw, gyda £38 miliwn ar gyfer gwelliannau i ansawdd dŵr yfed a’r amgylchedd. Mae buddsoddiad gwerth £3 miliwn wedi’i gynllunio i gymorth twf drwy sicrhau bod yna gynhwysedd rhwydwaith ar gyfer datblygiadau newydd, gyda £5 miliwn yn rhagor yn cael ei ddyrannu i gynlluniau i liniaru’r perygl o lifogydd carthion i eiddo.
Mae Dŵr Cymru Welsh Water yn ‘gwmni nid-er-elw’ sydd wedi bod ym mherchnogaeth Glas Cymru ers 2001. Nid oes ganddo gyfranddalwyr, ac mae unrhyw wargedion ariannol yn cael eu hail-fuddsoddi yn y busnes er budd cwsmeriaid.
Cliciwch yma i weld map o'r buddsoddiad.
Gorffen
Ymholiadau i swyddfa gwasg Dŵr Cymru Welsh Water ar 029 2055 6140.
Uchafbwyntiau am y flwyddyn
Canlyniadau Ariannol
- y cynnydd isaf mewn biliau o’r holl gwmnïau dŵr a charthffosiaeth am yr ail flwyddyn yn olynol. Ar ôl didynnu chwyddiant Y Mynegai Prisiau Manwerthu (RPI), mae bil cyfartalog Dŵr Cymru i gartrefi yn cael ei ragamcanu gan Ofwat i fod yn 6% yn is yn 2015 nag yr oedd yn y flwyddyn cyn i Glas Cymru afael yn awenau perchnogaeth Dŵr Cymru;
- perfformiad sy’n arwain yn y sector gyda gweithredu yn effeithlon o ran costau, gyda 3% o ostyngiad real pellach mewn costau gweithredu, gan fynd â chyfanswm y gostyngiad i 8% ers 2001;
- gerio – cyfanswm y benthyciadau net fel canran o werth yr asedau rheoliadol – wedi’i ostwng i 65% o 67% yn 2011, ac o 93% yn 2001;
- statws credyd uchaf yn sector cyfleustodau’r Deyrnas Unedig;
- buddsoddiad cyfalaf o £262 miliwn (i fyny o £242 miliwn yn 2011);
- elw (cyn treth a symudiadau gwerth teg) o £7 miliwn wedi’i gadw yn y busnes er budd cwsmeriaid.
Gwasanaeth i Gwsmeriaid
- ansawdd dŵr uchel yn cael ei gynnal, gyda 99.96% o samplau a gymerwyd wrth dapiau cwsmeriaid yn cydymffurfio â safonau;
- 90% o foddhad cwsmeriaid, gyda gwasanaeth o ddydd i ddydd, fel a fesurir gan ymchwil olrhain annibynnol a gan ymchwil a gynhaliwyd gan Ofwat, rheolydd y diwydiant, fel ei gilydd;
- 89% o foddhad cwsmeriaid busnes, fel a fesurir gan ymchwil annibynnol a gynhaliwyd gyda chwsmeriaid mwyaf Dŵr Cymru;
- cwynion gan gwsmeriaid yn cael eu cwtogi fwy na hanner, i lai na 5,000;
- dim ond 116 eiddo a brofodd doriadau heb eu cynllunio i gyflenwad oedd yn para mwy na 6 awr;
- mae carthffosydd preifat yn awr yn gyfrifoldeb i Dŵr Cymru, sydd o ran potensial yn dyblu maint ein rhwydwaith carthffosiaeth, gan gael gwared â gofid a chostau i lawer o’n cwsmeriaid cartrefi;
- mwy na 13,000 o rwystrau i garthffosydd yn cael eu clirio, gan gyfyngu ar nifer y digwyddiadau o lifogydd i lai na 200 o eiddo, y canlyniad gorau ers amryw o flynyddoedd;
- tua 44,000 o gwsmeriaid cartrefi yn elwa o un o dariffau cymdeithasol Dŵr Cymru sy’n arwain yn y sector a’r Gronfa Cymorth Cwsmeriaid.
Yr Amgylchedd
- fe wnaeth 43 o draethau a phum marina ennill Baneri Glas – sef traean o’r cyfanswm a ddyfarnwyd i’r cyfan yn y Deyrnas Unedig – ac fe gafodd 53 o wobrau Arfordir Gwyrdd ar gyfer traethau gwledig hefyd eu hennill;
- nifer uchaf erioed o draethau Cymru’n cael eu cymeradwyo yn Y Canllaw Traethau Da (The Good Beach Guide);
- targed gollyngiadau’n cael ei gyrraedd, ac mae o yn awr ar ei lefel isaf erioed - mae gollyngiadau wedi’u haneru ers yr 1990au;
- dim cyfyngiadau ar ddefnyddio dŵr ledled ein rhanbarth gweithredol ers 23 o flynyddoedd;
- digwyddiadau o lygredd difrifol yn cael eu cwtogi i ond pedwar, a chyfanswm y digwyddiadau o lygredd a achoswyd gan rwystrau mewn carthffosydd a chyfarpar sy’n torri hefyd yn is; fodd bynnag, ni wnaeth 22 o weithfeydd trin dŵr gwastraff (allan o fwy nag 800) gydymffurfio â’u caniatâd; ar ben hynny, ni chymerwyd samplau digonol mewn pedwar gwaith arall i allu dangos cydymffurfiad; mae cynllun cildroad “llwybr carlam”, a ategir gan fuddsoddiad ychwanegol o £30 miliwn, yn datblygu’n dda, ac mae’n perfformiad hyd yn hyn yn 2012 yn well nag yn yr un cyfnod ‘llynedd.
- allyriadau carbon yn cael eu cwtogi 12% neu 40,000 tunnell fetrig, gyda chynlluniau ynni adnewyddadwy gwyrdd newydd yn llwyr weithredol yng Nghaerdydd a Phort Talbot.